Natumod na sang Bacolod Gugma Foundation ang mga lugar nga patigayunan sang road closure para sa selebrasyon sang MassKara Festival 2025.
Ginpatpat ni AJ Marquez, Bacolod Gugma Foundation Inc, Interagency head sa ginpatigayon nga press conference ang proposal para sa road closure nga patigayunon kadungan sang selebrasyon sang Masskara Festival 2025.
Ang proposal ang resulta sang coordination meetings kaupod ang Bacolod City Police Office-Traffic Enforcement Unit, Bacolod City Disaster Risk Reduction Management Office, Bureau of Fire Protection kag Bacolod Traffic and Transport Management Department (BTTMD).
Magapatigayon sang road closure sa Bacolod Public Plaza kag Bacolod City Government Center umpisa alas-3:00 ang takna sa hapon tubtob alas 3:00 ang takna sang kaagahon.
May yara sang ingress sa Plaza kag Government Center sa Setyembre 28 tubtob 30 bangud sini ipatuman ang half road closure nga magaumpisa alas 10:00 ang takna sa aga tubtob alas 6:00 ang takna sang gab-i samtang gintalana ang egress sa Oktubre 20 takna alas 3:00 ang takna sang kaagahon tubtob alas 12:00 ang udto.
Samtang sa Lacsons Tourism Strip, ang ingress ang magaumpisa sa Oktubre 13 tubtob 15 kag ipatuman ang half road closure ang magaumpisa alas 7:00 ang takna sa gab-i tubtob alas 6:00 ang takna sa aga.
May ipatuman man nga full road closure sa Lacson Street halin sa Cottage Road padulong sa BS Aquino Drive sa Oktubre 16 ala 1:00 ang takna sa hapon tubtob alas 6:00 ang takna sa aga sang Oktubre 21.
Sa tion naman sang electric MassKara Streetdance Competition, ipatuman man ang full road closure halin sa Burgos Street padulong sa St. Francis Avenue sa Barangay Taculing alas 4:00 ang takna sa hapon tubtob alas 9:00 ang takna sa gab-i.
Samtang sa Arena and Streetdance Competition School kag Barangay Category, ipatuman ang full road closure sa Paglaum Sports Complex tubtob sa Bacolod City Public Plaza ala 1:00 ang takna sa hapon tubtob alas 8:00 ang takna sa gab-i sa Oktubre 18 tubtob 19.
Sa nasambit nga full road closure apektado ang mga dalan nga ginalakipan sang Araneta Street, Rodriguez Avenue, Quezon Avenue, Henaez Street, Gatuslao Street, Rosario Street, San Sebastian Street, Ballesteros Street kag Luzuriaga Street, Bacolod City.
Ang proposal para sa road closure ang natalana pa nga aprubahan sang Bacolod City Council.
Nagapangayo man ang pamunuan sang Bacolod Gugma Foundation sa mga Bacolodnon kag bisita sang ila kooperasyon bangud nga maapektuhan sila sa road closure apang kinahanglan ini nga mapatuman para sa safety sang tanan sa selebrasyon sang festival.
