Ginkumpirmar sang Civil Aviation Authority of the Philippines (CAAP) nga rocket debris ang narecover sa baybayon sang Barangay Poblacion, San Juan, Siquijor kahapon.
Sa interview sang Bombo Radyo Bacolod kay Lieutenant Junior Grade Richelito Arbis, deputy commander for operations sang Coast Guard Station Siquijor, may-ara sang persona nga nakakita sang unidentified floating object kag ini ang nagreport sa ila substation alas-10:15 kahapon sang aga.
Gilayon man nga ginpadulongan sang Coast Guard personnel ang lugar kag narecover ang mga metal debris nga naga-utaw utaw sa 200 meters gikan sa baybayon.
Ang metal debris ang may 10 feet height kag 5 feet width.
Gilayon man sila nga nagkoordinar sa San Juan Municipal Government nga amo ang nagcontact sa CAAP.
Ini bangod ginaduha-duhaan kun ang mga metal debris ang gikan sa rocket ukon sa eroplano.
Sa karun yara na sa kustodiya sang CAAP ang debris para sa imbestigasyon, samtang inisyal na nga nagkumpirmar ang ahensya sa PNP aviation group nga rocket debris ang narecover.
Nahibaluan nga sang Agosto, may ginpagwa na nga advisory nga nagapaandam sa risgo nga may magtupa nga rocket debris sa Puerto Princesa kag Tubbataha Reef sa Palawan gikan sa Long March 12 rocket sang China.
Ginalantaw ang posibilidad nga mahimo naanod ang rocket debris kag nakalab-ot sa baybayon sang Siquijor.
