Nagbalik na sa ila tagsa ka puluy-an ang pila sa mga nag-evacuate matapos mabahaan sa ciudad sang Bacolod kahapon matapos nga magsubside ang tubig baha.
Sa data sang Bacolod City Disaster Risk Reduction Management Office, nagdangat sa kapin 2,500 ka pamilya ang naapektuhan sang pagbaha bangud sa Bagyo Opong sa ciudad sang Bacolod.
Sa nasambit nga numero 297 ka pamilya ang yara sa sulod sang evacuation center.
Suno kay Ramirez, ang yara sa sulod sang evacuation center ang ginalakipan sang duha ka pamilya ukon walo ka indibidwal nga nagikan sa Barangay Taculing, Bacolod City, sa Barangay 10 duha ka indibidwal nga ginalakipan sang isa ka senior citizen kag isa ka Person with Disability (PWD) kag sila ang nagtinir sa community center sa Barangay Hall.
Sa Barangay Banago nga may 171 ka ka pamilya ukon 525 ka indibidwal kag ang mga evacuees ang nagtinir sa Domingo Lacson National High School.
Sa Barangay Pahanocoy, may 120 ka pamilya ukon 600 ka indibidwal nga ginalakipan sang 51 ka mga adult; 14 ka mga senior citizen, 37 ka mga kabataan kag anum ka lapsag kag ang mga ini ang nagtinir sa Medalla Elementary School .
Samtang sa Barangay Cabug may yara sang duha ka pamilya nga ginalakipan sang duha ka senior citizen kag sila ang nagtinir sa Barangay Health Center.
May yara man sang apektado sang pagbaha apang wala nag-evacuate nga ginabug-usan sang 641 ka pamily ukon 2201 ka indibidwal sa Barangay Banago; 509 ka pamilya ukon 1102 ka indibidwal sa Barangay Pahanocoy; 500 ka pamilya ukon 2499 sa Barangay Mandalagan kag 600 ka pamilya ukon 2000 ka indibidwal sa Barangay Bata, Bacolod City.
Suno kay Ramirez, may pila na ka pamilya ang nakapauli matapos nga nagsubside na ang tubig baha.
