Nagakaagnas na sang nasapwan sang asawa ang bana sini sa Purok Malipayon, Barangay Sibucao, banwa sang San Enrique, Negros Occidental.
Ang biktima ang ginkilala kay alyas Joerly kag siya ang nasapwan nga yara na sa advance stage of decomposition sang iya asawa nga si alyas Joy sa folding bed sa sulod sang ila balay.
Sa interview sang Bombo Radyo Bacolod kay Police Lt Dante Eslit, Deputy Chief of Police sang San Enrique Municipal Police Station, sang nakabaton sila sang impormasyon angot sa nasapwan nga bangkay gilayon ang mga ini nga nagresponde.
Suno kay Eslit ang bangkay ang nakita nga nagakaagnas na sa folding bed kun sa diin ang lawas ang yara sa folding bed apang ang mga tiil ang yara na sa duta.
Santo sa imbestigasyon, ginpahayag sang asawa nga ang bana sini ang madugay na nga may ginatumar nga maintenance nga bulong.
Ginalantaw nga natural death ang gintunaan sang kamatayon sang biktima apang ginahulat pa sang mga otoridad ang resulta sang postmortem examination agud nga matumod ang matuod nga rason sang kamatayon ni alyas Joerly.
