Wala na sang kabuhi sang nasapwan ang isa ka senior citizen nga babayi sa baybayon sa banwa sang Calatrava, Negros Occidental.
Sa interview sang Bombo Radyo Bacolod kay Police Captain Jesus Alba, hepe sang Calatrava Municipal Police Station, ang insidente ang nagluntad sang September 30 sa Barangay Lo-oc, sa nasambit nga banwa.
Suno kay Alba, sang ginpadulungan nila ang lugar nakita nila ang naga-utaw utaw nga bangkay sang babayi sa baybayon sang Barangay Lo-oc.
Ang biktima ang ginkilala nga si Feliciana Baliwag, 60 anyos, ginapahayag nga may mental illness kag residente sang Barangay Cambayobo, Calatrava.
Ini ang ginkilala mismo sang iya hinablos.
Suno kay Alba ang biktima ang nagbisita sa iya utod sa Barangay Lo-oc.
Magapauli na kuntani ang biktima apang naglain ang panahon kag sa paglakat sini, hinali nga nagpangilat gani siya ang naglumpat kag nagdalagan.
Gindumdom sang pamilya nga nagpauli na ini, apang wala sila makahibalo nga ini ang nagpadagat.
Wala naman sang nakita nga foul play kag ginalantaw nga nalumos ang biktima nga gintunaan sang iya kamatayon.
