Mass lay-off sa mga federal workers, patigayunon sa America kasunod sang pagshutdown sang gobyerno

Magasugod na sa sulod sang duha ka adlaw ang mass lay-off sa mga federal workers sa Amerika suno sa White House.

Ini ang kasunod sang government shutdown sang Miyerkules, Oktubre 1, matapos nga mapaslawan ang Kongreso nga magkasugot sa bag-o nga spending plan antes ang deadline.

Maga-adjourn na ang US Senate nga nagpadugang naman sang kangahawa sa posibilidad nga mawad-an sang trabaho ang linibo nga mga pumuluyo kasubong man madulaan sang binilyon nga balor ang ekonomiya sang Estados Unidos.

Suno sa pila ka mga analyst, ginalauman nga mas dako ang mangin epekto sang shutdown sa karun kun ikumparar sang 2018.

Posible nga magadangat sa 40 percent sang federal workers ukon kapin 750,000 ka mga indibidwal ang mabutang sa temporary leave.