Nakapadala na sang bulig ang pila ka mga Local Government Units sang Negros Occidental para sa mga biktima sang 6.9 magnitude nga linog nga naghalit sa Cebu.
Suno kay Negros Occidental Provincial Disaster Risk Reduction Management Office Head Iren Bell Ploteña pila sa mga LGUs nga nagpadala na sang bulig kag augmentation para sa rescue efforts amo ang San Carlos City, Silay City kag Sipalay City.
Nauna naman nga nakapadala sang rescue kag medical team ang Talisay City.
Suno Ploteña, kaupod nga ginpadala ang duha ka mobile water filtration, isa ka ambulance, isa ka rescue truck kag duha ka utility vehicle.
Ang team nga ginpadala ang ginalakipan sang magamanage sa water filtration trucks, mga Emergency Medical Services ukon medical team kag support groups.
Suno kay Ploteña, sila ang magacheck-in sa Incident Command Post sa Bogo City, Cebu kag didto na mabatun sang instruction kun sa diin ideploy agud makabulig.
