Padayon nga nagahulat sang magaabot nga bulig ang tumandok sang Sipalay City, Negros Occidental nga yara sa karun sa Bogo City, Cebu nga isa sa mga nalinugan.
Sa interview sang Bombo Radyo Bacolod kay Noel Inosanto, wala pagid sang nag-abot nga bulig nga ginpadala para sa mga nabiktima sang 6.9 magnitude nga linog.
Suno kay Inosanto, padayon ang aftershocks nga mabatyagan kag ang pinakamabaskog ang nagluntad kahapon sang aga, nga nagdangat sa magnitude 5.1.
Plano nila kuntani nga magpadulong sa bukid apang nahadlok man sila bangud mabaskog man ang ulan.
Suno diri nagbakal nalang sila sang trapal bangud bukas man ang baligyaan kag ginhimo nga hayub hayub agud nga may matulugan.
Suno kay Inosanto nagakahangawa man ini bangud ang ila natungtungan sang hayub hayub ang drainage nga nagaderetso sa dagat.
Suno diri, nakulbaan siya nga mahimo marusdak ang drainage sa tion nga may mabaskog nga aftershocks.
Plano sini nga magsaylo malapit sa ginaubrahan nila kag sa kilid nalang store magatulog upod sang iya pamilya.
Nahangpan man sini nga wala pa sang may nakalab-ot nga bulig sa ila bangud tuman man kadamo ang nagapangayo sang bulig sa dalanon padulong sa ila nga lugar.
