Nagdangat sa kapin P5 million nga balor sang suspected shabu ang narecover sang Bacolod City Police Office sa sulod palang sang tatlo kagab-i humalin sang nag-umpisa ang selebrasyon sang Masskara Festival 2025.
Sa interview sang Bombo Radyo Bacolod kay Police Lt. Miller Dionio, spokesperson sang Bacolod City Police Office, ginalantaw nga mas madamo pa ang makumpiskar nga illegal nga druga samtang nagapadayon ang selebrasyon.
Suno diri, ginalauman na nga dako nga volume sang illegal nga druga ang makumpiskar kag nagasulod sa ciudad sa kada tion sang Masskara festival celebration.
Pahayag sini nga pila naman ka meeting ang napatigayon ni BCPO Director Police Col Joeresty Coronica kaupod ang mga City Drug Enforcement Unit, Station Drug Enforcement Team kag ang Philippine Drugs Enforcement Agency agud makahuman sang plano tuhoy sa problema.
Suno kay Dionio, ang pagkumpiskar sang dalagko nga volume sang suspected shabu ang resulta na sang madinalag-on nga pagpatuman sang early planning sang BCPO.
Halin sang Octubre 1, nagdangat na sa masobra P5 million ang nakumpiskar nga illegal nga druga.
Antes pa man nagbukas ang selebrasyon, may yara na sang ginamonitor nga mga personalidad ang BCPO nga posible magpasulod sang dako nga volume sang illegal nga druga sa Bacolod City.
Sa karun mahimo nga magdako ukon maggamay ang makumpiskar nga illegal nga druga bangud nakita nga mabaskog ang kampanya sang mga kapulisan batok sa illegal nga druga.
