Nangin masadya ang pagpatigayon sang World Teacher’s Day celebration sa isa ka mall sa Bacolod City subong nga adlaw.
Ini ang gintambungan sang kapin apat ka libo nga mga manunudlo gikan sa elementary kag high school.
Sa interview sang Bombo Radyo Bacolod kay Richard Gelangre, principal sang Bacolod City National High School kag Presidente sang Bacolod City Public School Teacher’s Federation, dako ang pasalamat sini sa mga opisyales sa ciudad sang Bacolod nga naghatag sang pagkilala sa ila nga mga manunudlo kag nagpaulan sang madamo nga mga prizes.
Ang tema sang subong nga tuig nga World Teacher’s Day celebration ang “Teachers: Builders of the Future.”
Nagtambong man sa aktibidad si Bacolod City Mayor Greg Gasataya, kag nag-apas man si Department of Education (DepEd) Negros Island Region Director Dr Ramir Uytico.
Yara man sa event kag naghatag sang mensahe si Association of Concerned Teachers (ACT) Partylist Representative Antonio Tinio.
Suno kay Gelangre, padayun ang panawagan sang mga manunudlo, partikular na sa karun nga kontrobersyal ang isyu sa kurapsyon nga mare-allign sa DepEd ang iban sa mga budget nga ginbuhin partikular na sa Department of Public Works and Highways (DPWH).
Pinaagi sini ma-imprubar ang mga pasilidad, madugangan ang classrooms, kag iban pa nga learning materials ang kabataan, nga makabulig agud mapasaka ang lebel sang edukasyon sa Pilipinas.
Panawagan man nila ang pagpasaka sang entry salary sa P50,000 para sa Teacher 1 samtang P32,000 naman sa non-teaching personnel.
Ini ang makaboost man sa mga manunudlo sa paghatag sang mas mataas nga kalidad sang edukasyon.
Samtang sa interview sang Bombo Radyo Bacolod kay Mayor Greg Gasataya, ginpasalig naman sini nga seguruhon sang City Government nga mahatag ang Emergency Cost of Living Allowance (ECOLA) ang mga manunudlo.
Tsekyron pa sini ang pondo sa masunod nga tuig para sa paghatag sang nasambitan nga benepisyo.
