Suportado sang Power Watch Negros ang hagna nga ginpropose ni Senator Rodante Marcoleta nga magadula sang value added tax (VAT) sa bill sang kuryente samtang ang may power consumption nga manubo sa 200 kilowatt-hours (kWh) kada bulan, ang librehon na lamang.
Ini ang ginpropose ni Marcoleta sa Senate session kag ginpangayo man ang suporta ni Energy Secretary Sharon Garin.
Sa interview sang Bombo Radyo Bacolod kay Power Watch Negros convenor Wennie Sancho, dako nga kasulhayan para sa mga konsumedor ang pagdula sang VAT sa kuryente.
Dugang pa sini nga magagmay nga pamilya gid ang makabenepisyo sa pagdula sang balayran sang mga may electric bill nga manubo sa 200 kilowatts per hour.
Aminado ini nga dako ang mabuhin sa revenue sang pungsod bangod sa madula nga taripa, apang nagapati ini nga masolusyonan ni Finance Secretary Ralph Recto ang tuhoy sa budget.
Dugang pa sini nga magakinahanglan man sang dako nga pondo para masubsidize ang bayad sa bill sang magamay nga mga pamalay, gani panawagan sini nga ire-allocate na lamang ang pondo para sa Ayuda para sa Kapos ang Kita Program (AKAP), Tulong Panghanapbuhay sa Ating Disadvantaged/Displaced Workers (TUPAD) kag iban pa nga government financial subsidies nga pili lamang ang mahatagan.
Kasubong man ang mahimo mabawi gikan sa ginkawat paagi sa flood control projects.
Paagi sa pagdula sang VAT sa kuryente halos tanan nga pamalay ang makabenepsyo, samtang bulig man ini sa mga pigado nga mamumugon agud mapasaka man ang ila purchasing power.
Suno diri, dako nga bahin sang sweldo sang mga mamumugon ang nagakadto na lamang sa balayran sa kuryente.
Panawagan ni Sancho nga kuntani may magahimo man sang appeal nga magaduso sa mga Senador nga ipasar ang proposal, bilang pagpakita sang suporta sang publiko.
