Gina-verify pa sang mga kapulisan sa Kabankalan City Police Station kun matuod nga katapo sang New People’s Army (NPA) ang nagtiro-patay sa isa ka lalaki sa Sitio Lumbia, Brgy Camansi, Kabankalan City, Negros Occidental sang Biyernes, Oktubre 3.
Ginkilala ang biktima kay Danny Francisco, kasado kag residente sang nasambit nga lugar kag siya ang chairman sang grupo sang Argrarian Reform Beneficiaries sa ila nga lugar.
Ang ginatudlo nga suspetsado ang tatlo ka wala makilal-an nga persona.
Santo sa imbestigasyon sang mga kapulisan ginpahayag sang utod sang biktima nga si Sonny nga samtang nagalakat ini pauli sa ila balay may nabatian ini nga duha ka lupok nga gindumdom sini nga palupok lamang.
Apang sang malapit na ini sa ila balay nabatian sini nga nagasinggit si Danny nga “Si Noknok palatyon,” nga nga nagatumod sa iya.
Bangud sa kahadlok nagpalagyo ini sa katubuhan kag nagpanago apang samtang nagadalagan liwat ini nakabati sang paglupok.
Sa ulihi ginpahibalo lamang si Sonny ni Aileen Sipao nga ang utod sini ang gintiro.
Gindala pa ang biktima sa ospital apang gindeklarar nga dead on arrival.
Si Danny ang nakaangkon sang pilas sa tangkugo kag sa abaga.
Sa interview sang Bombo Radyo Bacolod kay Police Lt Col. Roberto Indiape, Chief of Police sang Kabankalan City Police Office, indi man kilala sang pamilya sang biktima ang suspek nga nagtiro-patay sa ila himata.
May nagagwa nga impormasyon nga ang nagpatay sa biktima ang NPA apang subject for validation kag wala man sang witness nga makakumpirmar.
May yara man nga nabaton ang mga kapulisan nga impormasyon nga anay rebelde ang biktima apang subject for validation.
Dugang nga impormasyon nga nakuha nga ang biktima ang nagsungka sa 47th Infantry Battalion sang Philippine Army apang i-validate pa. Padayon pa ang ila imbestigasyon sa nagluntad nga shooting incident.
