Nadakpan na sang mga kapulisan sang Silay City Police Station si Regie Illustrisimo, ang naglabo kay Jeffrey Jimena sa Hacienda Marvi, Brgy. Rizal, Silay City, kahapon sang hapon.
Nahibaluan nga nagahampang sang basketball si Regie samtang ang magulang sini nga si Nicolas Illustrisimo Jr. ang nagaserbe nga referee.
Nagluntad ang argumento sa tunga sang mag-utod bangod wala nagkumporme si Regie nga wala nagtawag sang foul ang iya magulang.
Nagpalapit si Jeffrey para magtambag apang ini ang ginka-akig ni Regie.
Nagpauli si Regie agud nga magkuha sang binangon kag sa pagbalik, iya ginlabo ang asawa ni Jeffrey apang nasalawid ang binangon sa halayan sang bayo.
Gintinguhaan ni Jeffrey nga buligan ang iya asawa kag didto nalab-ot sang binangon ang iya tudlo sa natu-o nga kamot.
Samtang, gilayon naman nga nagpalagyo sa kampo si Regie apang nadakpan sa ginpatigayon nga hot pursuit operation sang mga kapulisan, gani sa karun nakahunong na sa Silay City Police Station.
