Ginsulod sang mga kawatan ang isa ka jewelry shop sa Bais City, Negros Oriental sang Sabado sang gab-i.
Ginabanta nga nagabalor sang P147,000 cash kag P2.3 million nga balor sang alahas ang nataban sang mga kawatan.
Sa interview sang Bombo Radyo Bacolod kay Police Lt. Col. Ricardo Tero, hepe sang Bais City Police Station, Sabado sang gab-i may yara sang nagtukar nga banda sa lugar gani wala nabatian nga may yara sang nagpamukpok sa store sang M Lhuillier.
Suno kay Tero, ginbuslutan sang mga kawatan ang likod sang jewelry shop kag didto nag-agi pasulod.
Ginpahayag sang hepe nga mahapos lamang nga nakahimo sang alagyan ang mga kawatan bangud indi mabakod ang pader.
Ginsulod sang isa sa mga kawatan ang shop kag gin-utod ang mga connection sa CCTV apang nakuhaan ini sang footage gani siya ang nakilal-an.
Ang na-capture nga nawong sang tawo ang may record na sa Bais City Police Station sa pagpangawat.
Dako man nga palamangkutanon sa mga kapulisan kun ngaa wala naghuni ang alarm sang jewelry store, bangud sila ang may alarm nga makadetect sang paghulag.
Ginabanta anum ka mga suspek ang nagsulod kag nagpangawat sa nasambit nga jewelry store.
Padayon pa sa karun nga ginapangita sang mga otoridad ang mga suspek agud madakpan kag mapasakaan sang nagakaigo nga kaso.
