Napasakaan na sang kaso ang driver sang Toyota Lite Ace nga naaksidente sa Hda. Sto. Rosario, Barangay Guimbala-on, Silay City, Negros Occidental nga nagresulta sa duha ka napatay.
Madumduman nga nagabiyahe na papauli ang mga biktima sakay sa nasambit nga salakyan nga ginamaneho ni Argie Braceros, 31 anyos, residente sang Carmen Avenue 6, Brgy. 40, Bacolod City sang nadulaan sang Braceros sa pagmaneho sang salakyan sa paglabay sa kurbada nga dalan.
Naglapaw ini sa lane kag nabunggo sa nakapark nga dump truck.
Bangod sa impact, nagtabog ang anum ka mga biktima nga nagasakay sa likod sang Toyota Lite Ace kag gindeklarar nga dead on arrival sa ospital si Gino Aparra, 24 anyos, residente sang Brgy Guimbala-on, Silay City, samtang ginbawian sang kabuhi kahapon sang aga si Jeremy James Diaz, 23 anyos, residente sang La Carlota City.
Samtang si Clint John Piodena, legal ang edad, residente sang Brgy Punta Taytay, Bacolod City ang nagapabilin sa ospital nga sa karun comatose kag yara sa sulod sang intensive care unit.
Sa interview sang Bombo Radyo Bacolod kay Police Lt Col. Mark Anthony Darroca, hepe sang Silay City Police Station, may apat na ka pamilya sang mga biktima ang nagpasaka sang kaso batok sa driver sang salakyan.
Suno kay Darroca, ginpasakaan sang kaso nga reckless imprudence resulting to homicide and physical injury si Braceros.
Suno diri, ginhingagaw nila nga mapasaka ang kaso sa prosecutors’ office kahapon.
Nagpanawagan ini sa pamilya sang biktima nga luyag magpasaka sang kaso batok sa driver sang salakyan nga makig-angot lamang sa police station.
Sa karun duha ang napatay samtang duha man ang nagapabilin sa ospital kag ang iban ang outpatient na.
Una na nga ginpahayag ni Darroca nga natukiban nga yara sa impluwensya sang makahulubog nga ilimnon si Braceros kag madasig ang pagpadalagan sini sang salakyan.
