Ginapaeksplikar sang alkalde sang Bacolod City ang mga empleyado sang Bacolod City Health Office angot sa mga issues kag kontrobersiya nga natukiban sang inventory team nga nagpasa sang report sa Bacolod City Legal Office.
Isa na diri ang mga nag-expire nga x-ray films kag manug-expire nga anti-rabies vaccine.
Sa pahayag ni Bacolod City Mayor Greg Gasataya, sang Martes sang hapon naghinun-anon na ang section head kaupod kanday City Health Officer Dr. Carmela Gensoli, City Administrator Atty. Mark Mayo, kag City Legal Officer Atty. Karol Joseph Chiu.
Ang mga empleyado sang health office ang ginpangayuan sang ekplinasyon angot sa mga issues kaangay sang 13,000 tubtob 14,000 ka expired nga x-ray films.
Nagpangayo man ang alkalde sang option kun ano pa ang mahimo sa expired nga x-ray films.
Una naman nga natukiban nga duha na ka tuig nga wala nagahatag sang x-ray services ang Bacolod City Health Office bangud sa guba nga x-ray.
Samtang natukiban man nga may yara sang ginbakal nga x-ray machine ang ciudad sang 2024 apang wala ginpagana bangud santo sa pahayag sang CHO, wala pa ang mga ini sang maplastaran bangud ang ginatukod nga Bacolod City Health Complex ang target nga butangan sini.
Suno sa alkalde, indi man puede nga hulaton sang CHO nga matapos ang health complex antes magamit ang ginbakal nga x-ray machine.
Sa karun himuan naman sang paagi agud nga mapagana ang x-ray machine kag makaserbisyo na sa mga pumuluyo.
Samtang nagpangayo man sang ekplinasyon ang alkalde sa kapin 1,500 ka mga vials sang anti-rabies vaccine nga manog expire na sa November 30.
Kagab-i, ginpirmahan sang alkalde ang Executive Order No. 59 nga nagamando sang paghatag sang libre nga Anti-Rabies sa mga nagakinahanglan sa Bacolod City.
