Ginbaha ang pila ka bahin sang Bacolod City matapos ang makusog kag wala untat nga pag-ulan humalin alas 8:00 sang gab-i tubtob alas 10:00 kagab-i.
Isa sa mga lugar nga naapektuhan kag naka-eksperyensya sang mataas nga pagbaha amu ang mga residente sang Purok Carvic, Barangay Mandalagan kun sa diin nagdangat sa tuhod kag hawak ang baha.
Suno kay Mary Jane Ibarra, residente sang nasambit nga purok, ginpakamaayo na lamang sini nga manirado sang iya nga sari-sari store bilang pagpangaman in kaso nga magsige pa ang ulan kag magtaas na gid ang baha kagab-i.
Suno kay Ibarra, naanad na ang mga residente sa pagbaha kun mag-ulan kag madugay na ini nga problema sa lugar.
Suno diri, may yara sang suba sa likod sang purok kag kun magtaob, nagadamo ang tubig nga nagakadto sa mga pamalay.
Suno sa iya, kun maghulaw ang ulan, madasig naman nga nagasubside ang baha.
Samtang, nagpatigayon naman sang rescue operations ang mga personnel sang Bureau of Fire Protection-Bacolod sa mga lugar nga nabahaan kagab-i.
Suno kay Fire Officer 2 Rolin Paulan, alas 8:30 sang gab-i gindeploy ang mga personnel kag sila ang naglibot sa Barangay Mandalagan kag pila pa ka mga lugar agud mag-assist sa mga pumuluyo nga naapektuhan sang pagbaha.
Sa Purok Carvic, sila ang naghamtang sang kalat kag nag-assist sa mga residente nga masulod sa subdivision ukon magwa sa Dalan Lacson.
Panugyan sini sa mga pumuluyo ilabi na sa mga flood prone areas nga mag-ulualigmat kag magbantay sa sitwasyon.
