Indi pagpatulan sang Malacañang ang mga istorya natuhoy sa plano nga pagpasaka sang impeachment complaint ni Cavite Representative Francisco “Kiko” Barzaga batok kay President Ferdinand Marcos Jr.
Suno kay Palace Press Officer USec. Claire Castro, sakop sang House of Representatives ang istorya natuhoy sa impeachment kag responsibilidad sang mga mamalidha ang pagproseso sini.
Una na nga nagpanawagan si Bargaza nga magresign sa pwesto ang Presidente, sa tunga sang iya alegasyon sang korapsyon sa Malacanang.
Suno kay Castro, mabudlay ang maghambal nga wala sang ebidensya ilabi na nga mahapos lamang ang magpasibangod kag maghambal sang mga tinaga apang kun wala sang ebidensya, indi ini dapat pagpatihan.
Dugang pa sini nga busy ang Presidente kag madamo sang ginahimo gani wala na niya ginasapak ang amu sini nga mga istorya.
