Ginkoronahan bilang Miss Bacolod MassKara 2025 si Sophia Kaye Zaragoza sa coronation night nga ginpatigayon sa University of St. La Salle Coliseum kagab-i.
Si Zaragoza ang nagbaton sang P150,000 nga cash.
First runner-up naman si Ysabella Wuthrich nga nagbaton sang P100,000 kag second runner-up si Mary Angelique Caballero nga nagbaton sang P50,000 nga cash.
Magluwas sa korona, si Zaragoza ang napilian man bilang Miss Photogenic kag Best in Festival Costume.
Si Zaragoza ang nagpanguna sa Question and Answer portion kun sa diin siya ang ginpamangkot ni Miss Universe Philippines 2024 Chelsea Manalo kun paano magaserbi iya katahom bilang pwersa para sa healing kag transformation sa komunidad.
Suno sa newly crowned Masskara Queen, ang beauty ang paagi sa pag-isa gani bilang isa ka Miss Bacolod Masskara, ginahimo sini ang iya nga purpose nga ipabatyag sa tanan nga sila ang included, kaangay na lamang sang mga ginabuhat sa karun sa Masskara Festival nga may mga aktibidad para sa vulnerable sector, persons with disabilities kag mga kasapatan.
Dugang pa sini nga kun nalakip ang tanan kag wala sang may mabilin, makaangkon ang Bacolod City sang market place sang creativity kag mga ideya nga magahatag sang dalan sa wala katapusan nga mga posibilidad.
Sa press conference nga ginpatigayon pagkatapos sang coronation, emotional nga ginpakigbahin ni Zaragoza nga ini ang ikaduha na nga kahigayunan nga siya ang nagpakigbahin sang Miss Bacolod Masskara matapos nga siya ang nagcompete man sang 2024.
Suno diri, nagduha-duha pa ini kun siya ang maga-intra subong nga tuig apang ang mga tawo nga nagasuporta kag nagapati sa iya amu ang nagduso diri nga magpadayon.
Suno sa 19-anyos nga First Year Tourism Management Student sa University of St. La Salle, 16-anyos pa lamang ini sang siya ang una nga nakigbahin sa pageant kag ang iya gin-intrahan amu ang Mr. and Ms. Teen Masskara gani malapit sa iya tagipusuon ang ini nga competition.
Ang iya advocacy amu ang paghatag sang job opportunities sa mga pamatan-on.
