Nangin madinalag-on ang Handog ng Bombo Radyo at Star FM sa MassKara Festival Concierto sa Plaza, a showdown of finest local bands nga ginpatigayon sa Bacolod City Public Plaza kagab-i, Oktubre 15.
Antes ang pormal nga pagsugod sang battle of the bands, nagperform live ang casts sang Toyang Ermitanya nga naghatag sang yuhom kag kalipay sa mga tumalan-aw.
Wala naman nakaupang ang maulanon nga tiyempo sa pagpakita sang mga contestants sang ila mga talento kun sa diin una nga nagperfom ang D’Overtone, ginsundan sang The Johnny’s, Next Page, VIOS, Dish Band kag Left Over.
Nakuha sang all girls band nga VIOS ang kampeonato kag nagbaton sang P30,000 nga premyo.
Nagpangaduha naman ang The Johnny’s nga lunsay naman mga lalaki kag nagbaton sang P20,000.
Samtang, second runner-up ang Dish Band nga nagbaton sang P10,000.
Nakabaton sang tag-P5,000 ang tatlo ka mga consolation prize winners nga ginalakipan sang D’Overtone, Left Over kag Next Page.
Ang VIOS ang ginalakipan sang pito ka mga kababainhan nga naga-edad 16-anyos tubtob 23-anyos.
Suno kay Trishia Malundo, lead guitarist sang banda, natukod ang VIOS sang sila ang nakigbahin sang Voice Idol of Sagay competition sang 2024 kag dira na lamang sang mga ini ginkuha ang ila band name.
Humalin sang Panaad sa Negros Festival, lima ka bulan nga wala sila may gin-intrahan nga competition gani sila ang gin-engganyo sang ila manager nga makigbahin sa Battle of the Bands sang Bombo Radyo.
Bangud kalabanan sa ila ang mga estudyante, nagatipon ang mga ini pagkatapos sang klase agud magpractice sang isa tubtob duha ka oras bilang preparasyon sa competition.
Suno kay Malundo, wala ini naglaom nga sila ang magadaog bangud mga sagad man ang ila mga kasumpong kag iban diri ang mga beterano na sa nasambit nga patag.
Ginapasalamatan sang banda ang ila mga supporters, sponsors kag pamilya nga nagkadto sa Bacolod Public Plaza agud makit-an sila nga magperform live.
