Nag-umpisa na kaina ala-1:00 sang udto ang full road closure sa Lacson Tourism Strip para sa mga aktibidad sang Masskara Festival 2025.
Ang ginsirad-an nga dalan ang humalin sa BS Aquino Driver – Lacson tubtob sa SSS (Cottage Road).
Ang full road closure ang patigayunon halin ala-1:00 kaina sang hapon tubtob alas-6:00 bwas sa aga; samtang bwas Oktubre 17 tubtob sa Oktubre 19, maga-umpisa naman ang full road closure alas-2:00 sang hapon tubtob alas-3:00 sang kaagahon sa kasunod nga adlaw.
Ang mga public utility vehicle nga magalabay sa area gikan South to North ang magaliko sa SSS lusot sa Gatuslao Street pagwa sa dalan Aguinaldo.
Ang salakyan ang magaliko naman sa BS Aquino Drive sa pagbalik sa Lacson Street.
Sa Biyernes sa pagselebrar sang Electric Masskara, magapatigayon man sang full road closure sa Circumferential Road gikan sa Dalan Burgos tubtob sa St Francis Avenue ukon Palmas – Donia Juliana.
Pasalig ni Bacolod Traffic and Transport Management Department (BTTMD) officer-in-charge Atty Reuben Sabig, aminado ini nga may kabudlayan sa pagliko sa cottage road bangod sa wala kag tuo nga nakapark nga mga salakya.
Pasalig sini nga ini ang ila man nga hawanan agud indi makatuga sang malala nga trapiko, apang aminado si Sabig nga indi nila basta mapahalin ang mga kliyente kag may hearing sa Hall of Justice.
Aminado man si Sabig nga BTTMD ang nagbutag sang mga linya para sa diagonal parking nga amo lamang ang nakita nga paagi agud mapaigo ang mga salakyan nga nakapark, apang ini ang nagakaon naman sang mas dako nga dalan.
Suno kay Sabig, may bastante nga numero sang ideploy nga traffic enforcers nga ibutang nila sa kada intersections agud maseguro nga tayuyon ang dalagan sang trapiko kag magiyahan sang husto ang mga motorista sa rerouting.
Sila ang may 15 ka personnel nga ideploy sa area, apang kung makita nga ini ang kulang gihapon, sila ang mahimo man magrequest sang dugang nga augmentation gikan sa iban nga deployment area.
