Arestado ang walo ka mga lalaki sa drug buybust operation nga ginpatigayon sa Purok Magtiayon, Barangay 10, Bacolod City alas-3:45 kaina sang kaagahon.
Ang subject person amo si Alias “Jong”, 27 anyos, single, wala sang trabaho kag residente sang Purok Kagaykay, Brgy. 2, Bacolod City, ginakonsiderar nga high value individual (HVI) apang wala sa listahan sang Barangay Anti-Drug Abuse Council (BADAC)
Nadakpan man sanday Christian, 24 anyos, residente sang Brgy San Isidro Jaro, Iloilo City; Alias Patrick, 25 anyos, kag residente sang Gen. Luna St. Iloilo City; Alias Janby, 23 anyos, residente sang Brgy San Isidro, Jaro, Iloilo City; Alias Gerimar, 22 anyos, residente sang Brgy Rosario, Dumangas, Iloilo; Alias Christian, 24 anyos, residente sang Brgy Cabugao Sur, Sta Barbara, Iloilo; Alias Tyrone, 26 anyos, residente sang Purok Camerole, Brgy 35, Bacolod City; kag Alias Charles, 26 anyos, kag residente sang Purok Kagaykay Brgy 2, Bacolod City, nga lunsay mga single kag wala sang trabaho.
Ang operasyon ang ginpatigayon sang Bacolod City Drug Enforcement Unit kun sa diin narecover sa mga ini ang 17 ka sachet sang suspected shabu nga ginabanta nagabug-at sang 30 gramos nga may standard drug price nga P204,000.
