Mga pinoy nga nag-upod sa “No Kings” anti-Trump protests sa America, kalabanan mga wala sang legal documents

Wala nagakompormi ang isa ka Filipino sa Maryland, USA sa ginpatigayon nga “No Kings” anti-Trump protests sa kapin 50 ka mga estado sa Amerika sang Sabado.

Suno sa American Civil Liberties Union, pito ka million ang nag-upod sa masobra 2,500 ka mga “No Kings” rallies nga gin-organisa sa nagkalain-lain nga estado sa Amerika bilang pagpamatok sa ila gintawag “authoritarianism” ni US President Donald Trump.

Nagdemand ang mga raliyesta sang pagbag-o sa politika kag pagreject sa ila ginapatihan tuman nga paggamit sang gahom.

Suno kay Bombo International News Correspodent Marielice Jocson direkta sa Maryland, ang “No Kings” protests ang madugay na nga ginahimo sang mga Democrats kag may mga Filipino man nga nag-upod diri.

Suno sa iya, kalabanan sa mga Pinoy nga nag-upod sa pagpamatok kay Trump amo ang mga wala sang legal nga dokumento kag nagapamatok sa tikang sang Presidente batok sa mga illegal immigrants.

Apang suno kay Jocson, kalabanan sa mga Filipino nga legal nga nagatinir sa Amerika ang nagakompormi sa mga polisa sang US President bangud unfair para sa ila nga nagabayad sang tax kag ang ila kwarta amu ang ginagamit sa pagsagod sa mga illegal immigrants nga masami ginatunaan pa sang krimen sa pungsod.

Wala man ini nagakompormi nga “authoritarian” ukon nagapahari-hari si Trump bangud nagapangabudlay ini agud matapos ang gyera sa nagkalain-lain nga bahin sang kalibutan.

Dugang pa sini nga kun nagapahari-hari si Trump, kuntani wala sila ginpahanugutan nga makaprotesta.

Suno diri, natapos ang mga rallies sang malinong kag wala man sila ginpunggan sang gobyerno bangud ini ang kabahin sang ila freedom of speech.