Nadugangan pa ang pag-usmod kag malaba nga litik sa duta malapit sa highway sa Barangay Mambaruto, Sipalay City.
Sa interview sang Bombo Radyo Bacolod kay Sipalay City Disaster Risk Reduction and Management Office Head Dionelo Bogtae, may natumod na sila nga rerouting plans inkaso nga matiphag nagid ang duta.
Suno kay Bogtae, nagkoordinar na sila sa Department of Public Works and Highways (DPWH) agud nga mabutangan sang weight limit sang mahimo makalabay nga salakyan bangud napanilagan nila sang nakaligad nga nagatay-og ang porsyon sang dalan sang naglabay ang mga trucks.
Ginsira man nila ang alagyan pasaka kag naglisensya sila sa tag-iya sang duta nga kudalan nalang gid agud wala na sang may makasulod pa.
Gintsekyar naman sang Mines and Geosciences Bureau kag ginpahayag nga indi man tungod sa linog ang gintunaan sang pag-usmod kag paglitik sang duta.
Ginpatumod man ni Bogtae sa City Social Welfare and Development ang mga maapektuhan inkaso nga matiphag nagid ang duta bangud may yara sang mga pamalay sa idalom sang banglid sa pihak nga bahin sang dalan.
Una na nga ginpahayag ni Bogtae nga isa sa ginakahangaw-an ang pag-ulan, kun sa diin mahimo masudlan sang tubig ang crack kag maghumok nagid ang duta, nga mahimo makatuga sang landslide padulong sa highway.
Nagbutang naman sila sang warning nga landslide prone area ang dalan nga lalabyan padulong sa banwa sang Hinobaan.
Sa ila nauna nga pagtakos, tatlo ka metros ang kadalumon sang crack samtang ang distansya naman sang duta ang nagdangat sa 80 cm.
Ang pihak nga bahin sang duta ang nag-usmod naman sang tatlo ka tapak gikan sa orihinal sini nga ground level.
