Wala pa sang kaso nga napasaka sa driver sang SUV nga nakabunggo sa tricycle sa intersection sang Gatuslao kag BS Aquino Streets sa ciudad sang Bacolod kahapon sang kaagahon.
Nahibaluan nga duha ang napatay bangud sa aksidente.
Ginausoy sang Toyota Fortuner ang south to north direction samtang nagabyahe naman ang tricycle sa west to east direction sang nagluntad ang insidente.
Ang tricycle ang ginamaneho ni Openiano Ayco, residente sang Purok Tumpok, Zone 15, Talisay City, samtang sakay naman diri sanday Crislyn Joy Poja, Roda Tipon, Cheralyn Poja, kag Redilla Gamgam, lunsay mga residente sang Purok Sibucao, Brgy. Banago, Bacolod City.
Halin sila sa Barangay Banago kag padulong sa Libertad Public Market.
Ang SUV naman ang ginamaneho sang 17-anyos nga residente sang Sitio Marta, Brgy. Masulog, banwa sang La Castellana.
Bangud sa kakusog sang impact sang pagbunggo sang SUV sa tricycle, napatay sanday Cheralyn Poja, kag Redilla Gamgam.
Nagtabog pa ang iban nga karga sang tricycle kag nagpilit sa kilid sang salakyan ang mga hipon.
Sa interview sang Bombo Radyo Bacolod kay Police Major Elmer Bonilla, head sang Traffic Management Unit sang Bacolod City Police Office, nasaylo na sa paghinakop sang Department of Social Services & Development (DSSD) ang menor de edad nga driver.
Suno kay Bonilla, kun wala sang mapasaka sang kaso batok sa driver sang SUV ini ang makagwa man matapos ang 18 oras nga reglementary period.
Ang pamilya sang isa sa mga napatay ang indi na magpasaka sang kaso kun matuman ang ila nga kondisyunes apang ang pamilya sang isa pa napatay ang undecided.
Wala man nahibaluan kun sa diin halin ang SUV antes ini nakabunggo sa intersection sang Gatuslao kag BS Aquino Streets.
Samtang padayon pa ang pagpangita sang traffic investigator sang CCTV footage nga makabulig sa imbestigasyon bangud ang CCTV nga malapit sa ginluntaran sang aksidente ang wala nakuhaan ang natabo nga pagbungguanay.
Nagadayon sa karun ang imbestigasyon sang traffic investigators sa nagluntad nga aksidente.
