Nakilala na ang babayi nga nasapwan nga wala na sang kabuhi sa kahilamunan sa Barangay 12, Bacolod City kahapon sang hapon.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, ang bata nga babayi ang trainee sang isa ka kumbuyahan nga nagabaligya sang construction supplies.
Suno kay Depasucat, natigayon nga matumod ang identity sang biktima bangud sa uniform sa trabaho nga suksok sini.
Suno sa station commander, ginkadtuan sang imbestigador ang construction supply company nga ila lead sa pagtumod sang identity sang biktima kun sa diin ini ang positibo nga nakilala sang iya mga kaupdanan sa trabaho.
Sa impormasyon nga natipon sang Bombo News Team ang babayi ang ginkilala kay Freya Go, 17 anyos kag residente sa ciudad sang Bacolod.
Madumduman nga kahapon sang hapon nasapwan ang bangkay sang dalagita sa kahilamunan sa likod sang Pope John Paul Tower.
Nakaluslos ang pang-idalom sini nga panapton, kag nakahigot ang mga kamot sa iya nga likod.
Ang bangkay ang nasapwan sang isa ka driver nga naalangan kag magapamuhin kuntani sa lugar.
