Nakaalerto ang Office of the Civil Defense – Negros Island Region in kaso nga may dugang nga mga aktibidad sa Bulkan Kanlaon matapos ang minor explosive eruption nga nagluntad alas 8:05 kagab-i.
Sa interview sang Bombo Radyo Bacolod kay OCD-NIR Director Donato Sermeno III, wala sang may ginpang-evacuate matapos ang paglupok sang bulkan apang may nareport nga ashfall kag baho sang asupre sa La Castellana, La Carlota, San Carlos, Murcia kag Bago City.
Ginkumpirmar naman sang Bacolod Disaster Risk Reduction and Management Office nga naglab-ot ang ashfall sa Barangay Punta Taytay kag Barangay Sum-ag sa Bacolod City.
Suno kay Sermeno, nagapabilin sa karun sa Alert Level 2 ang status sang bulkan gani indi kinahanglan nga i-evacuate ang mga pumuluyo sa 4 to 6 kilometer extended danger zone.
Suno diri, wala naman sang may nareport nga damages humalin sang paglupok sang bulkan kag sa karun wala ini sang dugang nga mga aktibidad.
Wala sini ginadula ang posibilidad sang masunod pa nga mga eruption gani nakaalerto ang ila response clusters nga ginalakipan sang Department of Social Welfare and Development, Armed Forces of the Philippines, Philippine National Police kag Philippine Coast Guard in kaso nga ipasaka ang alert level.
Nagapanugyan ini sa mga pumuluyo ilabi na sa mga nagapuyo sa palibot sang bulkan nga makig-angot sa ila mga local disaster risk reduction and management offices.
