Ginkumpirmar sang station commander sang Bacolod City Police Station 1 nga asphyxia ukon pagkuga ang rason sang kamatayon ni Freya Go ang babayi nga nasapwan patay sa Barangay 12, Bacolod City, Oktubre 22.
Sa interview sang Bombo Radyo Bacolod kay Police Captain Francis Depasucat, nabaton na nila ang autopsy report sang ginfollow-up sang imbestigador kag nagwa nga rason sang kamatayon ni Freya amo ang pagkuga.
Dugang nga nakita sa report nga may indikasyon sang sexual abuse bangud may nakita man nga semen sa kinatawo sang biktima.
Suno kay Depasucat, nagapadayon man ang imbestigasyon nila sa karun kag kung matapos na diri mataod-taod kun sa diin ini ginhimuan sang krimen.
Ginpahayag man sini nga nagpadulong na sa opisina sini si Lito Go ang amay ni Freya kag nakahinun-anon na sini.
Ginpangayuan niya ini sang impormasyon sang mga natabo ukon mga nanotisyaran sini antes ang natabo sa iya bata.
Suno sa amay nagakadto lang ini sa boarding house sang biktima kada Domingo kag wala man sang nahibaluan nga may nagapamahog sa iya nga anak.
Blanko man ang iloy sang biktima kun sin-o ang posible may kahimuan sa iya anak.
Sa karun nagapadayon ang imbestigasyon sang mga kapulisan sa kaso ni Freya agud matumod ang nagpatay kag mahatagan sang hustisya ang kamatayon sang biktima.
Una na nga nagpahayag ang alkalde sang ciudad sang Bacolod nga magahatag ini sang P100,000.00 sa makatudlo sa nagpatay sa menor de edad.
