Gin-aprubahan na sang Department of Budget and Management (DBM) ang P740.834 million nga balor sang dugang nga budget para sa quick response funds sang Department of Social Welfare and Development (DSWD) kag Department of National Defense-Office of Civil Defense (OCD).
Sa isa ka statement, ginpahayag sang DBM nga sa nasambit nga kantidad, P640.834 million ang gin-release para sa DSWD kag P100 million naman sa OCD.
Suno sa Budget Department nga naghingyo ang DSWD sang P640.834 million nga QRF replenishment agud ibakal sang dugang nga family food packs kag non-food items nga ila gina-standby sa ila warehouses.
Magluwas sini, gamiton man sang ahensya ang pondo para sa pagbakal sang transport kag delivery services kag stand-by funds para sa ila Regional Offices.
Sa bahin sang OCD, ang ila QRF ang ginpain para sa Maintenance kag Other Operating Expenses sang ahensya bilang suporta sa ila disaster management operations tubtob matapos ang tuig 2025.
