Nagapadayon ang pagpadala sang mga kapulisan sang request sa access sa CCTV footage sa mga establshmento nga mahimo nalabayan ni Freya Mae Go antes ini nasapwan sa Barangay 12, Bacolod City sang Oktubre 22.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, nagapadayon ang imbestigasyon sa kaso ni Go kasubong man ang pag-validate sang mga impormasyon nga mahimo makabulig sa imbestigasyon kag pagsolbar sang kaso.
Suno kay Depasucat, ginahulat pa nila sa karun ang extraction sang mga CCTV footages sa ginpadal-an sang request para sa CCTV footages access.
Ginabaton man sang mga establshmento ang request apang ginahulat pa ang extraction bangud kinahanglan pa sang mga ini sang approval sang management.
Nagdangat na sa 15 ka mga establshmento ang ginpadal-an sang request sang mga otoridad.
Suno diri, ginpasangkad man nila ang ginpatigayon nga mga backtracking agud nga mahibaluan ang lugar nga ginkadtuan sang biktima antes pa man ini nga nadula kag nasapwan nga patay na.
Naestorya naman sang station commander ang iloy sang biktima apang ang amay ang wala na liwat maestorya sang mga kapulisan.
Nagapanawagan man ini sa tanan nga kun sin o man ang may yara sang impormasyon nga makabulig sa imbestigasyon sa kaso ni Go mahimo lang makig-angot sa talatapan sini sa Bacolod Police Station 1.
