Ginkumpirmar sang Israel nga nabaton na nila ang bangkay sang isa ka hostage nagikan sa Gaza nga ginhatag sang Hamas sa International Red Cross.
Suno sa Israel Defense Forces (IDF) kag Israel Security Agency (ISA), ipaidalum ang bangkay sa test examination agud matumod ang iya identity sa Tel Aviv.
Ginhingyo sang mga otoridad nga indi anay maghatag sang mga spekulasyon tubtob nga maabisuhan ang pamilya sini.
Kun makumpirmar, ini na ang ika-16 sa 28 ka mga bangkay sang mga hostages nga nabalik sa idalum sang ceasefire deal.
12 sa gihapon ang nagapabilin nga missing sa Gaza.
Suno sa mga reports, aminado ang Hamas nga wala pa sini nakit-an ang tanan nga bangkay.
Ginpahayag naman sang Amerika nga ginpasiguro sang Hamas nga pagahimuon sini ang tanan agud mabalik ang mga ini.
