Indi magpati ang political analyst sa ginpagwa nga Statement of Assets, Liabilities, and Net Worth (SALN) ni Senator Francis “Chiz” Escudero nga yara lamang sa P18.84 million ang iya net worth.
Sa interview sang Bombo Radyo Bacolod kay Atty Jomax Ortiz, indi mapatihan nga masobra P18 million lamang ang net worth sang Senador bangod antes paman ini nagsulod sa politika, multi-millionaire na ang amay sini nga anay kongresista.
Dugang pa sini nga madugang man sa net worth ni Escudero ang manggad sang iya asawa nga si Heart Evangelista nga may P50 million networth, bangod mangin conjugal property na ang ila propidad.
Indi lamang makonsiderar ang conjugal rights kun may-ara sang prenuptial agreement sa mag-asawa nga nagaseparar sang ila mga manggad.
Suno kay Ortiz, ang P18 million nga manggad ang ordinaryo nga manggad na lamang sang pila ka mga Bacolodnon nga kilala sini, gani indi mapatihan para sa iya nga amo lamang ang kabug-usan nga networth sang senador.
Dugang pa sini nga madamo sang mga antes magsulod sa politika nga haluson kagang-kagang ang salakyan, apang sa pagpungko nagadamo na ang bag-o nga salakyan.
Wala na ini sa karun sang makita sang kaangay nga sitwasyon sa iya sadto sang siya ang alkalde sa Salvador Benedicto kun sa diin siya ang nagacommute na lamang bangod naforeclose ang iya salakyan kag haluson indi makapa-eskwela sang iya bata sa college.
Dugang pa sini nga madamo sang politiko nga naggastos sang ginatos ka libo kag iban milyon pa sa pagpangampanya, nga suno sa iya bawion sang sobra-sobra pa sa pagpungko na sa pwesto.
