Subong nga Biyernes, ulihi nga adlaw sang bulan sang Oktubre, lauman nga mangin maulanon ang panahon sa Southern Luzon, Visayas kag Mindanao bangod sa Intertropical Convergence Zone ukon ang pagsugat-anay sang hangin gikan sa Northern kag Southern Hemisphere.
Lakip sa mga lugar nga may mataas nga tyansa sang pag-ulan sa Mimaropa, Calabarzon, Metro Manila, Western Visayas, sa atun sa Negros Island Region, BARMM, SOCCSKSARGEN, Davao Region, Lanao del Norte kag Zamboanga Peninsula.
Subong nga special non-working holiday, bangod sa malauman nga maulanon nga tiyempo, ginapanugyan ang pagdala sang panaming sa ulan kun magabisita sa mga minatay.
Samtang ang Shearline ukon pagbunggu-anay sang mainit kag mabugnaw nga hangin ang makatuga naman sang maulanon nga panahon sa Cagayan Province, Isabela, kag Aurora.
Ang Northeast Monsoon ukon Hangin Amihan ang magadala naman sang mahinay nga mga pag-ulan sa Batanes.
Mangin mainit kag mapaang naman ang aga tubtob sa udto sa Ilocos Region, Cordillera, Central Luzon, Eastern kag Central Visayas, Caraga, kag Northern Mindanao, apang mangin mataas man ang tyansa sang gulpyada kag makadali nga pag-ulan sa hapon tubtob sa gab-i bangod sa Localized Thunderstorms.
Samtang padayun ang pagmonitor sa Low Pressure Area sa gwa sang Philippine Area of Responsibility.
Ini ang ulihi nga nasiplatan sa 1,690 km sa nasidlangan sang Southern Mindanao.
Sa karun ini ang wala pa ginalauman nga mangin Bagyo, apang mahimo nga madevelop bilang Bagyo sa Domingo ukon sa Lunes nga amo man ang pagsulod sini sa PAR.
Gani lauman ang maulanon nga panahon sa nasidlangan nga bahin sang Visayas kag Mindanao sa Lunes, kadungan sa pagbalik sa trabaho matapos ang UNDAS.
