Nagdoble ang numero sang mga pasahero ang nagpadulong sa probinsya sang Negros Occidental kadungan sang obserbasyon sang fiesta minatay subong nga tuig.
Sa interview sang Bombo Radyo Bacolod kay Lt Jr Grade John Hofer Olis, spokesperson sang Coast Guard Station-Northern Negros Occidental, halos nagdoble ang numero sang pasahero nga nagsulod kag nagwa sa mga pantalan sa Negros Occidental.
Ang mga pantalan ang ginalakipan sang Bredco port, Pulupandan, EB Magalona, Cadiz, San Carlos kag Escalante City.
Suno kay Olis sang Oktubre 31, nagdangat sa 9,344 ang inbound passengers samtang 7,110 naman ang outbound.
Suno diri ini ang mas mataas kung ipaanggid sa nagligad nga inadlaw nga nagdangat lamang sa 2,000 ang inbound kag 1,000 naman ang outbound passengers.
Wala naman sang nakumpiskar nga mga ginadumilian nga mga butang sa mga pantalan sa palibot sang Negros Occidental.
Nagpatigayon man sila sang panelling sa pagpanguna sang K-9 unit sang Philippine Coast Guard.
ay ginpreparar man sila nga mga personnel nga magaresponde sa tion nga maglupok ang Bulkan Kanlaon.
Dugang pa nga may yara man sang ginpangdeploy nga Coast Guard personnel sa mga patyo.
Samtang may yara sang reported nga drowning incident sa Hacienda Fermina, Barangay Maao, Bago City sang Nobyembre 1.
Suno kay Olis, bangkay na sang nasapwan si Dave Villaruz, 22 anyos kag residente sang Barangay Handumanan, Bacolod City.
Suno diri, upod ni Villaruz sa paglangoy sa suba sa nasambit nga lugar ang mga abyan kag ang girlfriend sini nga si Kia Baluyot, 23 ang edad.
Bangud sa malain nga tiyempo kag mabaskog nga current naanod si Kia kag Dave apang ang babayi ang nasapwan nga buhi samtang ang lalaki ang patay na matapos ang duha ka oras nga search operation.
