Ginpasiguro ni President Ferdinand Marcos Jr. nga makabaton sang bulig ang mga residente nga naapektuhan sang Bagyo Tino, matapos sini ginmando sa tanan nga ahensya sang gobyerno ang madasig nga pagresponde sa kalamidad.
Suno kay Presidential Communications Office (PCO) kag Palace Press Officer Undersecretary Claire Castro, yara na sa mga apektado nga lugar ang mga ahensya sang gobyerno agud magdul-ong sang pagkaon, bulong kag iban pa nga nagapanguna nga panginahanglanon.
Gilayon man nga nagpadala ang Department of Health sang mga bulong, matinlo nga mainom nag tubig, hygiene kits kag water containers sa Cebu, Aklan kag Eastern Visayas.
Samtang, nagpanagtag naman ang Department of Social Welfare and Development (DSWD) sang masobra 121,000 family food packs kag 1,600 ready-to-eat meals sa mga rehiyon sang CALABARZON, Bicol, Visayas, Caraga, kag pila ka bahin sang National Capital Region kag Zamboanga.
Suno kay Castro, nagabantay sa karun ang mga miyembro sang Gabinete sa sitwasyon agud masiguro ang madasig nga pagdul-ong sang bulig sa tanan nga apektado nga lugar.
