Ginalauman sang Department of Social Services and Development nga yara nalang sa kapin 500 ang mga mabilin nga evacuees sa Bacolod City.
Sa interview sang Bombo Radyo Bacolod kay DSSD Head Dr Ritchelle Verdeprado Mangga, 7,495 ka pamilya ukon 25,969 ka indibidwal ang kabug-usan nga narecord nga evacuees sa 43 ka mga evacuation sites sa Bacolod City.
Bangod nagapauli na ang kadam-an sa mga evacuees, ginalantaw ni Mangga nga ang mabilin amo na lamang ang mga wala mapulian bangod ginguba sang Bagyo TINO ang ila nga mga balay, kag ginalantaw nga mapanubo na ang evacuation sites sa lima tubtob napulo.
Ini ginalakipan sang mga wala na sang atop ukon mga natumbahan sang kahoy bangod sa tuman ka baskog nga hangin.
Ginapakamaayo naman sang opisyal nga madamo sang mga pumuluyo nga nagsunod sa preemptive evacuation nga nakabulig kun ngaa wala sang recorded nga casualties ukon napatay sang maglaslas ang Bagyo.
Suno diri, nagabuligay man ang madamo nga mga evacuees kaangay sa paghimo sang kaugalingon nga community kitchen.
Panawagan naman sini sa mga pumuluyo nga mag-bayanihan partikular na sa paghimos sang mga nagkalatumba nga kahoy sa mga pamalay kag mga dalanon.
