Ginmando sang Department of the Interior and Local Government (DILG) ang pag-suspend sang foreign travel sang tanan nga mga elected kag appointed local officials humalin Nobyembre 9 tubtob Nobyembre 15, 2025.
Ini ang kasunod sang pagsulod na ni Bagyong Uwan sa Philippine Area of Responsibility kag agud masiguro ang presenya sang mga opisyales sa Ila tagsa ka mga area para sa pagpatigayon sang pre-disaster preparations, response, kag recovery operations.
Ginpabutyag ni DILG Secretary Jonvic Remulla nga ang mga gobernador, mayor, kapitan sang barangay, kag iban pa nga lokal nga opisyal kinahanglan mangin lider mismo sa ila lugar, suno sa mando ni Presidente Ferdinand R. Marcos Jr. kag sa pagdeklarar sang state of national calamity.
Ginpahanumdom man sang DILG ang mga local leaders nga suno sa Local Government Code of 1991 kag Republic Act No. 10121, sila ang nagaserbe bilang chairman sang ila Local Disaster Risk Reduction and Management Councils (LDRRMCs) kag dapat ‘present’ ang mga ini sa tanan nga bahin sang disaster management—preparasyon, pagresponder, kag pagbangon kasunod sang kalamidad.
Ginapanawagan man sa mga LGU nga magbulig sa mga naapektuhan nga komunidad, pag-reactivate sang Local Price Coordinating Councils agud malikawan ang pagpamahal sang mga balaklon, kag magkoordinar sa mga Regional kag Provincial DRRMCs kag DILG Regional Offices para sa husto kag nagakaigo nga tikang.
