Padayon nga ginabulong sa balay-bulungan ang isa ka babayi nga government employee matapos nga maigo sang bala samtang yara sa ila balay sa isa ka subdivision sa ciudad sang Bacolod.
Sa impormasyon nga nakuha sang Bombo News Team ang nasambit nga babayi ang personnel sang Bureau of Jail Management and Penology kag isa Jail Officer 1.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, pag-abot nila sa lugar nakita nila ang babayi nga nagahigda, kag gilayon nga gindala sa ospital bangud nakita nga may sinyales pa sang kabuhi.
Suno diri, ang tanan nga angulo ang ila gina-imbestigaran kalakip ang alegasyon nga gintuyo sang biktima nga utason ang iya kabuhi.
Wala pa sila sang konkreto nga detalye kag natalana pa nga maghinun-anon sa ginikanan sang biktima.
Nahibaluan nga kritikal sa karun ang kondisyon sang babayi matapos nga makaangkon sang samad sa ulo.
