Para sa kilala nga political analyst ang kabuhi ni anay Senate President Juan Ponce Enrile puno sang duag kag kontrobersiya.
Kahapon, nagtaliwan si Enrile sa edad nga 101 sa balay sini samtang kaupod ang iya pamilya.
Sa interview sang Bombo Radyo kay Atty Jomax Ortiz, maalam nga klase sang tawo si Enrile nga may matood nga pangalan nga Juan Valentin Furagganan.
Suno diri, si Enrile makaagi nga nangin Justice Secretary, Defense Minister, Senate President kag Chief Presidential Legal Counsel sa administrasyon ni President Bongbong Marcos.
Si Enrile sadto ang legal affairs liaison ni former President Ferdinand Marcos Sr apang may plano ini nga coup d’etat batok sa administrasyon nga wala nadayon matapos mahibaluan ang plano nila ni Lt. Col. Gregorio Honasan.
Ginplano man sini nga mag-establishar sang revolutionary government agud siya ang mangin tagdumala apang ang panawagan sadto sang mga tawo amo nga si Aquino ang mapungko bilang presidente.
Pahayag ni Ortiz, ang esturya sang kabuhi ni Enrile may yara man sang madulom nga bahin apang madamo man ini nga nahimo sa mga Pilipino bilang opsiyal nga pinakamalawig nga nagpungko sa Senado.
