Ginsaysay sang isa ka survivor sang pagbaha sa Purok Riverside, Barangay Robles, La Castella, Negros Occidental matapos ang paglaslas sang Bagyo Tino.
Sa interview sang Bombo Radyo Bacolod kay Melvin Membrido, nag-inulan sadtong tion kag nakita sang mga ini nga nagasaka na ang tubig sa suba gani ginsulong nila ang current sang tubig agud nga makagwa sa ila lugar.
Suno kay Membrido, kaupod sini sa paghalin sa ila lugar ang pamilya sang iya bayaw kasubong man sang iya bata.
Ang anum ka mga kabataan ang ila nga gin-aba agud nga makagwa sa lugar.
Wala man sila sang nadala nga gamit pagwa sa ila nga mga puluy-an.
Suno kay Membrido alas 10:00 ang takna sang aga gulpi nga nagsaka ang tubig.
Suno diri ang current ang mabaskog kag ginpangtumba lamang ang mga puluy-an sang mga ini.
Wala naman sila sang balay nga mabalikan bangud ang lima ka balay sang ila mga pamilya ang ubos na anod sang tubig.
Suno pa kay Membrido sa edad sini nga 59 ini ang una nga bes nga nakaeksperyensya sang tuman kadako nga pagbaha ang ila nga lugar.
Ginalantaw nga naghalin ang tubig sa nabukid nga bahin sang La Castellana.
Ginkalipay lamang sini nga bisan paano nakasalbar sila tanan apisar nga wala na sila sang balay nga mabalikan.
Madamo man ang nagapadala nga bulig sa ila kag wala man sila ginapabay-an sang Local Government Unit.
