Liwat nga ginmanduan sang alkalde sa ciudad sang Bacolod ang garbage hauler nga magdouble time kag magdoble sang ila effort sa pagkolekta sang basura.
Sa interview kay Bacolod City Mayor Greg Gasataya, masobra isa ka semana na nga madamo sang mga basura nga wala makolekta sa palibot sang ciudad sang Bacolod.
Bangud sini ginhambalan sang alkalde ang IPM Construction & development Corp nga dapat sila ang magpagwa sang madamo nga garbage trucks kag mag-operate 24/7 bangud sa tuman ka damo nga halakuton nga basura.
Suno kay Gasataya, tanan nga malabayan niya nga mga basura nga wala makolekta ang ginpakuha sini sa garbage hauler.
Pila sa mga rason nga wala nakapangkolekta gilayon ang IPM amo ang kakulangan sang trucks kag paglaslas sang Bagyo.
Suno sa alkalde, sila na ang bahala sa mga kahoy nga nagkalatumba bangud sa bagyo, gani ang ubrahon na lamang sang garbage hauler amo ang magkolekta sang basura.
Dugang pa sini nga wala na dapat sang rason nga indi makolekta ang basura.
Kinahanglan nga makolekta ang mga basura ilabi na nga subong nga adlaw, Nobyembre 19, nag-umpisa na ang Terra Madre kun sa diin 200 ka international chefs kag 22 ka local chefs gikan sa nagkalainlain nga lugar, ang nagpadulong sa Bacolod City para sa event.
