Ginkalipay sang pila ka mga Senador ang nangin pamatbat sang korte nga reclusion perpetua ukon 40 ka tuig nga pagkapriso kay former Bamban, Tarlac Mayor Alice Guo.
Ginpamatbatan nga guilty si Guo sang Pasig Regional Trial Court Branch 167 may kaangtanan sa kaso nga qualified trafficking in persons bangud sa operasyon sang illegal nga Philippine Offshore Gaming Operators (POGO) sa Bamban.
Suno kay Senator Risa Hontiveros, isa sa mga nagpanguna sa imbestigasyon sang Senad may kaangtanan sa POGO, isa ini ka kadalag-an batok sa korapsyon, human trafficking, cybercrime kag iban pa nga transnational crimes.
Padayon man nga manukot ang Senador sang accountability sa kada ahensya sang gobyerno na nagpalpak sa ila mga katungdanan.
Nagalaom naman si Senator Bam Aquino nga kun ano kadasig ang pagpamatbat kay Guo sa kaso sang POGO, kuntani mangin madasig man ang pagresolbar sang mga issue nga nagapalibot sa maanomaliya nga flood control projects.
Para naman kay Senator Sherwin Gatchalian, nga isa man sa mga nagduso agud mabatuan ang illegal nga POGO sa pungsod, ang ini nga kadalag-an ang magapabakod pa sa mga layi sang pungsod batok sa POGO.
