Malacañang, nanginwala nga sila ang sa likod sang mga huring-huring nga islan si House Speaker Bojie Dy

Ginpanginwala sang Malacañang ang alegasyon nga sila ang yara sa likod sang mga huring-huring nga islan si House Speaker Faustino “Bojie” Dy III.

Suno kay Communications Undersecretary Claire Castro, wala nagahilabot si President Ferdinand Marcos Jr. sa anuman nga trabaho sang legislative branch.

Dugang pa ni Castro nga kun anuman ang desisyon kag himuon nga mga tikang sa Kamara ang wala na nalakip sa jurisdiction sang Presidente.

Nagwa ang mga balita sang pag-ilis sa House Speaker sang tinalikdan nga mga inadlaw bangud ginaalegar nga nagapangita ang mga kaalyado sang Presidente sang mas mabakod nga leader sa Kamara bangud sa mga huring-huring nga impeachment batok kay Marcos.