Gin-anunsyar sang Appeals Chamber sang International Criminal Court nga ila pagadesisyunan sa maabot nga Nobyembre 28 ang interim release appeal ni former President Rodrigo Duterte.
Una nga ginbasura sang Pre-Trial Chamber sang ICC ang hingyo nga interim release ni Duterte sang Setyembre 26.
Sang Oktubre 14, nagfile ang defense team sang apelasyon samtang ang prosecution kag mga biktima ang nagsabat sang Oktubre 21.
Madumduman nga sang tinalikdan nga semana, ginhangkat sang ICC Office of the Prosecutor ang Appeal Chamber nga ipabilin nga nakadetain si Duterte matapos nga napaslawan ang defense nga pamatud-an nga wala sang legalidad kag actual errors ang desisyon nga siya ang ikustodiya.
Humalin sang Marso, priso sa ICC detention facility ang ika-16 nga Presidente sang Pilipinas bangud sa kaso nga crimes against humanity may kaangtanan sa war on drugs sang iya administrasyon.
