Nagapati ang political analyst nga pabor sa presidente sang Pilipinas kun indi gilayon makabalik sa pungsod si anay Ako Bicol Partylist Representative Zaldy Co.
Ini matapos nga nagpagwa ang Sandiganbayan sang warrant of arrest batok sa anay kongresista kag 17 ka iban pa.
Kahapon, personal nga gin-anunsyar ni President Ferdinand “Bongbong” Marcos Jr sa social media nga may ginpagwa na nga warrant of arrest batok sa 1st batch sang mga natumod nga involved sa anomalous flood control projects.
Ang ginpasaka nga kaso amo ang paglapas sa Republic Act 3019 ukon Anti-Graft and Corrupt Practices Act, kag Malversation of Public Funds.
Sa interview sang Bombo Radyo Bacolod kay Atty. Jomax Ortiz, pabor sa presidente kun indi makabalik gilayon sa Pilipinas si Co bangud madula ang political instability sa pungsod.
Suno kay Ortiz, kun makabalik sa Pilipinas si Co kag makahatag sang iya testimoniya may dako ini nga epekto sa presidente.
Dugang pa sang abugado nga indi man dali dali nga makapauli si Co bangud sa kahangawa nga mangin kaangay kay former Senator Ninoy Aquino ang iya nga kapalaran
Depende naman kay Co kun paano makapabilin sa ginatiniran nga pungsod, apang sa karun ang nagapabilin na lamang sini nga opsyon amo ang political asylum.
Bangud may yara na ini sang warrant of arrest, lauman nga kanselahon ang passport kag visa sang anay kongresista.
