Lauman nga may yara sang pagnubo sa presyo sang Gasolina samtang may pagsaka naman sa presyo sang Diesel kag Kerosene sa masunod sa semana.
Suno kay Department of Energy Oil Industry Management Bureau Assistant Director Rodela Romero, base sa apat ka adlaw nga trade monitoring sang Means of Platts Singapore, lauman nga may pagnubo nga P0.50 sa kada litro sang Gasolina samtang may pagsaka naman nga P0.50 sa kada litro sang Diesel kag P1.35 sa kada litro sang Kerosene.
Suno kay Romero, ang pagbag-o sa presyo ang bangod sa global oil supply kag demand kasubong man sa geopolitical tension sa mga pungsod.
Paathag ni Romero, naghatag sang abiso ang Organization of the Petroleum Exporting Countries and allies (OPEC+) nga may yara sang oversupply sa Gasolina rason nga may yara sang rollback sa presyo.
Samtang ang pagsaka naman sang presyo sa Diesel kag Kerosene mahimo bangod sa nagapadayon nga tensyon sa mga pungsod kasunod sa pagdagdag sang sanction sang Estados Unidos sa oil companies sang Russia, Iran kag Venezuela.
