Magapasa liwat sang resolusyon si Bacolod City Councilor Wilson Gamboa sa Sangguniang Panlungsod agud nga ipanawagan ang pagdagdag sang show cause order batok sa Prime Water.
Ang show cause order ang agud makahatag sang paathag ukon justification ang water concessionaire nga indi pagsuspendihon sang ciudad ang Joint Venture Agreement (JVA) sini sa Bacolod City Water District.
Sa interview sang Bombo Radyo Bacolod kay Gamboa, indi insakto ang ginahimo sang nasambit nga water concessionaire.
Suno sa konsehal makapila na ini mag-ayo nga diskusyunan ang mga issues may kaangtanan sa serbisyo sang nasambit nga kumpaniya apang nabulanan lamang wala man napatawag ang mga ini.
Sa karun magapasa ini liwat sang resolusyon kag i-attached ang mga news articles sang mga reklamo batok sa kumpaniya.
Ginpahayag man sang konsehal nga sang ginpasulod niya ang una ng resolusyon wala sang business permit ang water concessionaire kag subong lamang nga 2025 ginhingagaw proseso sang nagpungko si Bacolod City Mayor Greg Gasataya.
Suno diri minilyon ang ginakuha sini sa pondo sang ciudad apang ang serbisyo indi na maagwanta.
Suno diri ang mga kunsumidor ang wala na sang maayo nga supply sang tubig kag nadugangan pa ang agoniya sang naglabay ang bagyo sa ciudad.
Suno sa konsehal may pila man ka mga kunsimidor nga may yara gid man sang tubig apang malubog man.
Suno kay Gamboa dapat na nga maghimo sang tikang ang ciudad agud nga maproteksyunan ang mga kunsumidor gikan sa lawlaw nga serbisyo sang Prime Water.
