Ginaluman nga mangin mas manubo ang pagsulod sang foreign direct investments (FDI) sa Pilipinas tubtob 2026 bangud sa nagapadayon nga mga isyu sang kurapsyon, suno sa Fitch Solutions unit BMI.
Ginpahayag sang BMI nga magapangatubang ang Pilipinas sang kabudlayan sa pag-enganyo sang investors matapos nga nagnubo ang bahin sang FDI sa economic growth sang second quarter sa 1.3 percent nga mas manubo kumpara sa 2.5 percent average antes sang COVID-19 pandemic.
Samtang ang FDI ang nakarekord sang $494 million nga net inflows sang Agosto, nga nagapakita sang 40.5 percent nga pagnubo kumpara sa $830 million sa pareho nga bulan sang nakaligad nga tuig.
Gindugang pa sang BMI nga base sa datos nga 40 percent sang remittances halin sa Estados Unidos, ang mahimo nga maghinay man ang pagsulod sang remittances pag-abot sang 2026.
Sa pihak sini, ang Kongreso subong ang nagaimbestigar sa mga alegasyon sang irregularidad sa public works matapos ginpahayag ni President Ferdinand Marcos Jr. nga 20 percent sang P545 billion nga pondo para sa flood control ang nagkadto lamang sa 15 ka mga contractor.
