Nagdangat na sa P4.19 bilyon ang kabilugan nga halit sa agrikultura nga tuga sang Super Typhoon Uwan, santo sa pinaka-ulihi nga data sang Department of Agriculture (DA).
85,689 ka mga mangunguma kag mangingisda ang naapektuhan.
Suno sa Department of Agriculture-Disaster Risk Reduction and Management Operations Center, nagapadayon ang koordinasyon sa mga lokal nga gobyerno agud mapadasig ang recovery efforts.
Nagapabilin man ang price freeze sa mga lugar nga yara sa idalom sang state of calamity, samtang nagapadayon ang hugot nga price kag market monitoring.
Nag-umpisa naman nga nagpanagtag sang agricultural inputs kaangay sang hybrid rice seeds, white corn seeds, kag fingerlings ang mga regional field offices sa Cagayan Valley kag Mimaropa.
Kalakip sa mga available nga intervention ang P414.51M nga balor sang inputs para sa palay, mais, kag high-value crops; P1.24M para sa animal feeds; P771,620 nga balor sang bangrus, tilapia, kag carp fingerlings; kag zero-interest loans nga tubtob sa P25,000 sa idalom sang SURE program.
Sa data sang Department of Agriculture, high-value crops ang may dako nga kapierdihan nga nagdangat sa P2.66B nga kahalitan, sunod ang palay nga may P732.48M, kag fiber crops nga may P428.37M.
Naglab-ot naman sa 164,274 metric tons ang nadula nga produksyon halin sa 99,572 hectares sang duta nga ginatalauma.
Padayon nga gina-monitor sang DA ang presyo sang agricultural commodities kag kondisyon sang road networks agud masiguro ang madasig nga transportasyon sang mga produkto kag bulig para sa mga apektado nga lugar.
