Nagapanawagan ang Council of Concerned Citizens (C3) sa Department of Public Works and Highways (DPWH) kag Independent Commission for Infrastructure (ICI) nga mag-deputize sang voluntary investigation team sa kada Congressional District nga maga-imbestigar sang flood control anomalies.
Sa interview sang Bombo Radyo Bacolod kay Atty Renecito Novero, siya mismo ang nagsumiter sang report sang C3 sa ICI, tatlo ka opisina sa Senado, kag Department of Public Works and Highways central office.
Ini ang una pa lamang nga bahin sang ila investigation report nga kaupod ang mga reklamo sang mga pumuluyo angot sa malala nga pagbaha sa Bacolod City.
Pasalig sini nga sa padayun nila nga imbestigasyon, malauman nga sa masunod may mga pasakaan na sang kaso administratibo kag kriminal.
Halimbawa sini ang mga nakita nga mga flood control projects nga may 261 days contract duration nga ginsuguran sang 2023, nga tubtob sa karun wala matapos.
Suno diri, ang kaangay nga mga palpak nga proyekto ang nagresulta sa malala nga pagbaha nga napunggan ukon napahagan-hagan kuntani kun human na ang proyekto.
Pasalig ni Novero nga wala sang pamulitika sa ila trabaho bangod ang malala nga pagbaha nga resulta sang kurapsyon ang indi man pamulitika.
Dugang pa sini nga sila ang wala man nagabaton sang funding gikan sa mga politiko, sa baylo ang tanan nga gastos ang gikan sa ila nga bulsa.
Kaangay sa C3, nakita ni Novero nga madamo man sang volunteers sa ICI nga willing maghatag sang serbisyo agud mapapanabat ang mga yara sa likod sang flood control corruption.
Apang pahanumdom ni Novero nga indi masarangan sang ICI nga sila lamang.
Gani ginapanugyan sini nga magdeputize ang ICI sang mga volunteer teams nga maga-imbestigar sa kada Congressional Districts ukon sa tanan nga may DPWH District Offices.
Kaangay sa C3 nga ginabug-usan sang mga engineers, abogado, pari, negosyante kag iban pa nga sektor.
Ini bangod ang mga proyekto ang gikan sa mga insertions sang Congressional Offices kag mga DPWH offices nga nagahatag sang proyekto sa ila ginapaboran nga contractor.
